Madinalag-on nga napatigayon ang Grand Opening sang Masskara Festival 2025.
Ginpangunahan ni Bacolod City Mayor Greg Gasataya kaupod ang pila ka mga opisyal ang pagbukas sang kapiyestahan sa Bacolod City Government Center grounds kagab-i.
Antes ang speech sang Alkalde, ginpangabay sini ang mga Bacolodnon kag mga bisita nga maghatag sang silent prayer sa mga biktima sang linog.
Sa mensahe sang alkalde, nagdesisyon ang ciudad nga maghatag sang financial nga bulig para sa mga pumuluyo sang Cebu nga nabiktima sang 6.9 magnitude nga linog nga nagtay-og sang Martes sang gab-i, September 30 kag iga-request sini sa Sangguniang Panlungsod nga mapadasig ang approval sang budget.
Ginpahayag man sang alkalde nga magalunsyar ang ciudad sang donation drive sa tanan nga luyag nga magbulig sa mga biktima.
Suno kay Gasataya ang rason sa pagselebrar sang Masskara Festival amo ang madamo nga pagpanghangkat nga ginpangatubang sang Bacolod City kag Negros Occidental.
Dugang pa sini nga sang nagliligad nga semana may yara man sang natabo nga krisis sa isa ka Barangay sa Bacolod, apang madasig nga nakarecover bangud sa maayo nga pamatasan sang mga Bacolodnon.
Gani nagselebrar sang Masskara Festival 2025 agud nga iselebrar ang resilience sang mga Bacolodnon.
Ginpasalamatan man sang alkalde ang Bacolod Gugma Foundation sa pag-organisar sang mga events para sa Masskara Festival 2025.
Samtang sa estimate sang Bacolod City Police Office nagdangat sa 50 mil ka mga tawo ang nagpadulong sa Bacolod City Government Center Grounds para sa grand opening sang Masskara Festival 2025.
Magluwas sa banda ni Elias TV, yara man ang aktres nga si Ara Mina kag ang banda nga Silent Sanctuary ang naglingaw sa mga Bacolodnon.
