Ginpangunahan sang obispo sa Diocese of Bacolod ang ginpatigayon nga Grand Rosary Mass Rally for Peace kaina sang aga sa University of Saint La Salle Coliseum.
Ang prayer rally ang nakasentro sa pagpangamuyo para sa karun nga sitwasyon sang kalibutan partikular na sa Pilipinas.
Lakip sa mga ginpangamuyuan ang mga biktima sang linog sa Cebu, biktima sang mga pagbaha kasubong man ang malala nga kurapsyon sa gobyerno.
Ang aktibidad ang gintambungan sang mga estudyante gikan pa sa nagkalainlain nga mga eskwelahan.
Sa mensahe ni Rv Fr. Patricio Buzon, Bishop sang Diocese of Bacolod, padayun ang ila nga adbokasiya sa pagpanawagan sang hustisya, kag sa pagpabalik sang kwarta nga ginkawat sa publiko.
Suno diri, dapat manabat ang mga naghimo sang sala, kag dapat nagid bag-uhon ang bilog nga systema sa panggobyerno.
Ang Pilipinas ang ginpaanggid sang obispo sa computer nga may virus, nga kinahanglan nagid nga ireset.
Apang pahanumdom ni Bishop Buzon nga ang pagbag-o ang mas maayo nga suguran sang kabataan.
Pahanumdom sini sa mga kabataan nga samtang estudyante pa lamang, likawan na ang pagbinutig kag pagpanginto, partikular na ang cheating sa eskwelahan.
Suno diri, dapat magkabuhi sang tampad, kag indi dapat pagkawaton ang answer sang iban nga nagpangabudlay sa pagtuon.
Ang pagpangawat sa lamharon nga edad ang pundasyon man sa pagpangawat sang dako sa palaabuton.
Gani suno kay Bishop Buzon, dapat sunod ang values ni Ginoong Hesu Kristo nga mangin giya sa tampad nga pagbag-o.
