Ginalantaw sang Bureau of Jail Management and Penology – Negros Island Region (BJMP-NIR) nga ang greyhound operation nga ginpatuman ni Jail Chief Insp. Crisyrel Awe sang magpungko ini bilang Jail Warden, kun sa diin madamo sang narecover nga cellphones, ang isa sa rasun kun ngaa ginapanawagan sang mga person’s deprived of liberty (PDL) nga siya ang pahalinon.
Madumduman nga boluntaryo nga nagpanaog sa pwesto si Awe kahapon matapos ang noise barrage sang mga person’s deprived of liberty (PDL), agud indi sini ma-impluwensyahan ang imbestigasyon.
Siya ang temporaryo naman nga ginbuslan ni Jail Senior Insp. Raymund Aro, bilang Officer In Charge.
Sa interview sang Bombo Radyo Bacolod kay BJMP-NIR Spokesperson Jail Senior Inspector Juniven Umadhay, wala sila sang nakita nga prima facie evidence nga may nakomiter nga violations si Awe.
Una naman nga natumod nga rasun sa pag-ibwal sang mga detainees ang pagpatuman sang coupon system agud madula ang kwarta sa sulod sang jail facility nga nagatuga sang inequalities sa mga priso.
Samtang wala man sang violation ukon maltreatment sa pagsuksok sang battle gear, sa baylo na-intimidar lamang ang mga PDLs.
Sa ila padayun nga imbestigasyon, natumod nga sa pagpungko pa lamang sa pwesto, gilayon nga nagpatuman sang surprise greyhound operation si Awe kun sa diin madamo sang nakumpiskar nga cellphones.
Pahayag ni Umadhay nga ang cellphone sa sulod sang jail facility ang magamit sang mga priso sa pagpadayun sang illegal transactions.
Samtang nagluntad naman ang kinagamo matapos may nagpanghaboy sang bato, apang panindugan sang NODJ administration nga wala naggamit sang rubber bullets, sa baylo sila ang naggamit sang pepper balls./
Samtang wala man sang bisan nabakirasan sa jail personnel ukon sa mga PDLs.
Suno diri, kun mapamatud-an nga fabricated lang ang mga alegasyon kay Awe, sarang man ini nga ibalik sa pwesto, apang paathag ni Umadhay nga ang ginakonsiderar lamang sang BJMP Regional Director amo nga mapabilin nga malinong kag matawhay ang Negros Occidental District Jail.
