Ginpatigayon alas-10:00 kaina sang aga ang groundbreaking ceremony sa ipatukod nga standard Police Station para sa Bacolod Police Station 9 sa Barangay Cabug, Bacolod City.
Sa interview sang Bombo Radyo Bacolod kay Bacolod City Police Office Director Police Col. Joeresty Coronica, ginalauman nga makapatukod sang tatlo tubtob lima ka dugang nga standardized police stations.
Agud nga matigayon ang plano, kinahanglan nga mareclassify ang Bacolod City Police Office sa Type A gikan sa karun nga Type B status.
Suno Kay Coronica, ang Type B City Police Office ang may yara lamang sang maximum nga napulo ka police stations apang ang Type A ang mahimo makatukod sang tubtob sa 20 ka police stations.
Pahayag sang BCPO Director, nga ang tanan nga dokumento ang nasumiter na sa Kampo Crame paagi sa pag-indorso sang Police Regional Office – Negros Island Region, kag ginahulat na lamang ang approval sang National Police Commission (NAPOLCOM).
Dugang pa sini, nga aprobado na ang budget para sa Bacolod Police Station 8 kag 9.
Sa karun, ginatapos pa ang mga kinahanglanon nga dokumento agud makapatigayon man sang groundbreaking sa ipatukod nga bag-o nga Bacolod Police Station 8.
