Ginpatigayon na kaina ang ground breaking ceremony para sa rehabilitation ukon improvement sang Old Bacolod City Hall.
Ang aktibidad ang ginpangunahan mismo ni Bacolod City Mayor Alfredo ‘Albee’ Benitez kag gintambungan man sang mga opisyales kaangay sang mga konsehal, department heads, punong barangay kag iban pa.
Ang proyekto nga may budget nga P225 million kag target nga matapos sa 2025 ang ginalantaw madugangan pa sang P80 million budget nga ginahulat pa nga maaprubahan sang Sangguniang Panlungsod.
Sa speech ni Benitez, ginsaysay sini ang history sang Old Bacolod City Hall, nga 58 ka tuig na humalin sang gintukod.
Ini ang himuon nga 4-storey building, nga hamtangan sang opisina sang alkalde, bise alkalde kag mga konsehal, nga nakadesinyo ang kalaparon depende sa kataason sang pwesto.
Paathag sang alkalde nga ginhimo nila duha ang Office of the Congressman kag 16 ka Office of the Councilors, bilang preparasyon sa tion nga ma-aprubahan na ang proposal nga tungaon sa duha ka distrito ang Bacolod City.
Magapabilin man diri ang pila ka mga talatapan kaangay sang City Veterinary Office, Commission on Audit, General Services Office, Person’s With Disability Office, Office of the Senior Citizens Affairs kag Department of the Interior and Local Government (DILG).
Suno sa alkalde, luyag nila nga mapabilin ang historical heritage sang Old City Hall, nga sarang na sa karun mahimo bangod sa mga moderno nga teknolohiya.
Apang sa pihak sini, hakson man nila ang talento sang mga Bacolodnon pinaagi sa paghimo sa lugar bilang cultural site, nga makapasanyog sa artistic significance sang Bacolod City.
