Ginpatigayon kahapon ang groundbreaking ceremony sang bag-o nga gate sang Bacolod City Police Office (BCPO).
Ang gate ang gindonar sang mag-utod nga Panisales.
Suno kay BCPO Director Police Col. Joeresty Coronica, wala sang ginpagwa nga bisan piso ang mga kapulisan sa nasambitan nga proyekto.
Paathag sini nga siya ang naghatag sang konsepto, kag bangod may-ara sang architect ang pamilya, ini ang ila gin-enhance sa nanarisari nga desinyo kag ginpapilian na lamang sa iya.
Suno kay Coronica, ang pagdonar sang gate para sa BCPO ang nagapakita lamang nga yara pa gihapon ang pagsalig sang pumuluyo sa kapulisan.
Ang desinyo ang ginalantaw magadangat sa milyon ang balor samtang paathag sang BCPO director nga wala man sang standard design ang PNP sa nasambitan nga estraktura.
Suno diri, ang tinutuyo sang bag-o nga gate amo ang mabag-o ang perception sang mga tawo sa talatapan kag indi na kahadlukan ang pagsulod diri.
Samtang, gintambungan man mismo ni Police Regional Office 6 Director Police Brig. Gen. Jack Wanky ang nasambitan nga ground breaking ceremony.
Suno sa Regional Director, ini ang makabig milestone, bangod ang gate ang isa sa pinaka-importante nga estraktura sa kada kampo sang kapulisan.
Suno diri, ang daan nga gate ang nakadesinyo nga kaangay sa base militar kag para sa iban makahaladlukan ang magsulod sa pasilidad bangod diri makit-an ang mga kriminal.
Pinaagi sa pagbag-o sang gate, ini ang mas mangin welcoming kag mabugnaw sa mata, nga dapat mabatyagan sa mga public servant.
Ginapakamaayo ni Wanky nga apisar sa ginapangatubang nga isyu sang PNP sa Congressional kag Senate hearings kun sa diin sila ang ginagisa, makita gihapon nga nagapabilin ang pagsalig sang kumunidad.
Panawagan na lamang sini sa mga police personnel nga bayluhan sang maayo nga serbisyo ang suporta kag pagsalig nga ila ginabatun.
