Patigayunon na sa masunod nga bulan ang groundbreaking sang renovation sang Old Bacolod City Hall nga nahamtang sa corner Luzuriaga-Araneta streets sa downtown sang Bacolod.
Sa interview sang Bombo Radyo Bacolod Engineer Loben Ceballos, Officer-in- Charge sang Bacolod City Engineers Office, sa August 3 patigayunon ang groundbreaking kag nakumpleto na pangsaylo ang tanan nga mga opisina sang government agencies nga nahamtang sa Old Bacolod City Hall.
Suno kay Ceballos, ang opisina sang Department of the Interior and Local Government ang ginpahamtang sa Cybercenter kaupod ang duha ka iban pa samtang ang Treasurer’s Office ang ginbutang sa 117.
Ang budget para sa rehabilitation kag improvement project sang Old Bacolod City Hall ang nagdangat sa P223 million kag yara sa idalom sang P4.4-billion loan package nagikan sa Development Bank of the Philippines sang nakaligad nga tuig.
Suno sa OIC sang Bacolod City Engineer’s, ang Phase s1 sang nasambit nga proyekto ang matapos sa masunod nga tuig.
Ang nasambit nga proyekto ang apat ka panalgan kag may maligwa nga opisina sang gobyerno kag multi-level parking.
Diri man ibutang ang City Disaster Risk Reduction and Management Office, City Veterinary Office, General Services Office, Persons with Disability Office, Office of the Senior Citizens Affairs, Commission on Audit kag Department of the Interior and Local Government.
Sa karun nagapadayon na ang demolisyon sang Old City Hall magluwas sa fountain area bangud sa cultural value sini.
