“Betrayal of public trust” lamang ang nangin focus sang impeachment complaint sang Bayan Muna batok kay Vice President Sara Duterte.
Sa interview sang Bombo Radyo Bacolod kay Bayan Muna chairperson Atty. Neri Colmenares, isa lamang ang ground nga ila gintutukan sa pagfile sang impeachment complaint indi kaangay sa ginfile sang Akbayan nga nagdangat sa 24 ka grounds.
Ginsumiter sang mga ini ang complaint sa Secretary General sang House of Representative alas-3:30 kahapon sang hapon kun sa diin ang ila nga grounds amo ang “betrayal of public trust”.
Nalakip na diri ang bayolasyon sa paggasto sang confidential fund, kaangay sang pagpagwa sang P30 million para sa bulong, apang ang nasambitan nga alokasyon ang dapat nga nabutang sa regular budget, kag iban pa nga gingastosan nga indi dapat covered sang confidential funds.
Subong man ang falsification of documents, kalakip na sanday Mary Grace Piattos kag Kokoy Villamin, nga asignatories sa pagrelease confidential funds sang Office of the Vice President, apang wala bisan sa record sang Philippine Statistics Authority.
Kasubong man ang indi sini pagsabat sa mga pamangkot sa ginpatigayon nga Congressional hearings.
Paathag ni Colmenares nga sa mga impeachment complaint nga ginsumiter sang mga ini sadto, napamatud-an nga mabudlay kun tuman ka damo sang grounds bangod madamo man sang dapat pamatud-an kag mapakita nga ebidensya.
Sadto sila ang nagfile impeachment complaint sa apat ka grounds kag walo ka acts, kun sa diin ini ang nagdugay sang masobra anom ka bulan.
Samtang dapat naman nga pilion ang mas mabaskog nga grounds bangod ang pigaw nga grounds ang mahimo atakihon sang pihak nga partido.
