Nagpagwa sang statement ang Alliance of Concerned Consumers in Electricity and Social Services (ACCESS) paagi sa ila nga presidente nga si Wennie Sancho, sa pag engganyo sa mga city kag provincial government sa Negros Occidental sa pagactivate sang Price Monitoring Councils sa idalom sang RA 10623.
Ang RA 10623 amo ang layi nga nagahatag sang protection sa mga konsumidor paagi sa pagstabilize sang mga presyo sang Basic Necessities kag Prime Commodities.
Ini man ang layi nga nagabutang sang pagsulundan batok sa indi insakto nga pagsaka sang mga presyo sang balaklon sa tion sang emergency situations kag kaangay nga okasyon kag iban pa nga mga tinutuyo.
Sa interview sang Bombo Radyo Bacolod kay Sancho, ang ila ginpagwa nga statement ang kasunod sang panawagan sang mga pumuluyo sa tunga sang pagsaka sang presyo sa nagapanguna nga mga balaklon.
Suno diri, dapat nga i-activate ang local Price Monitoring Council agud nga maprokteksyunan ang mga konsumidor batok sa mga traders nga nagatake advantage sa sitwasyon kag nagapinagusto sa pagpasaka sang presyo sang nagapanguna nga balaklon.
Suno kay Sancho, indi malipod kag manigar nga ang tanan nga ang presyo sang agricultural products, bugas kag iban pa ang nagsalalaka.
Nagapati ini nga paagi sa pag-activate sang local kag provincial Price Monitoring Council mahatagan sang sabat ang problema sa indi na husto nga pagsaka sang presyo sang mga balaklon.
Ginpahayag man sini nga ang probinsya sang Negros Occidental ang ginpaidalom sa state of calamity bangud sa paglupok sang bulkan Kanlaon apang ang presyo sang mga balaklon ang tuman gihapon ka mahal.
Suno kay Sancho dapat ipatuman sang mga opisyales sang gobyerno kun ano ang nakasaad sa layi bangud madulaan sang pulos ang layi kaangay sang RA 10623 kun wala man ginapatuman.
Dugang pa sini nga ang purchasing power sang mga mamumugon ang naganubo apang nagasaka pa ang presyo sang mga balaklon.
Suno diri, kun ini ang magpadayon dako ang makatuga sini nga kabudlayan sa mga pumuluyo.
