Ginatumod na sang General Services Office sang ciudad sang Bacolod nga amo ang nagadumala sang Bacolod North Public Cemetery sa dalan Burgos ang grupo nga illegal nga nagapang-exhume ukon nagakalkal sang ginlubong sa sementeryo kag ginaislan sang bag-o nga lubong kabaylo sang kwarta.
Sa pagtsekyar sang Bombo News Team sa Burgos Cemetery sa sulod sang pila ka adlaw subong nga semana, madamo ang reklamo nga nadula ang lapida sang ila minatay, samtang ang iban naman, lungon na gid ang ginkawat.
Sa interview sang Bombo Radyo kay Bacolod City Administrator Atty. Joseph Eduard Cuansing, nakabaton sang impormasyon si GSO head Melvin Recabar nga may yara sang nagapangontrata sa sulod sang Burgos Cemetery bisan wala na ginapahanugutan diri nga bag-o nga lubong halin sang tinalikdan nga tuig.
Ang grupo suno kay Cuansing amo ang naga-identify sang daan na nga ginlubong sa sementeryo kag haluson wala na ginabisitahan kag ila nga gina-exhume agud nga malubngan sang bag-o kag nagasukot ang mga ini sang bayad.
Matukiban nalang sang pamilya nga illegal nga gin-exhume ang ila nga patay suno kay Cuansing kun magbisita na sila sa sementeryo kun tigkalalag.
Suno sa city administrator, nagmandu na ini nga himuon ang mga tikang agud nga mapunggan ang illegal nga ginahimo sa Burgos Cemetery kag makasuhan gid ang madakpan nga suspetsado.
Nagapati naman si Recabar nga gab-i nagakatabo ang kinawatay bangud wala sang security personnel ang city government nga ginpahamtang sa patyo kun gab-i.
Suno kay Cuansing, may nagabantay sa patyo kun daytime apang tubtub lang ini alas-5:00 sa hapon.
Ini man ang rason suno sa iya nga naghingyo ang city government sang bulig nagikan sa Bacolod City Police Office nga rondahan sang mga personnel sang Bacolod Police Station 4 ang Burgos Cemetery.
