Gin-athag ni Bacolod City Mayor Evelio “Bing” Leonardia nga wala sang bisan isa sa Grupo Progreso nga nagpahalin kay Councilor Al Victor Espino.
Sa statement nga ginpagwa sang alkalde, ginpahayag sini nga nakibot ang Grupo Progreso sa balita nga naggwa kahapon nga nasakitan si Espino sa nangin desisyon ni Mayor Bing nga pahalinon ini sa partido.
Dugang pa sang alkalde nga nagagwa sa balita nga gikan mismo sa iya ang pahayag.
Paathag ni Leonardio nga wala sang bisan isa sa partido nga nagpahalin kay Espino kaangay sa naggwa nga balita.
Paathag sini nga ang party meeting ang gintambungan sini, ni Vice Mayor El Cid Familiaran, Councilor Espino kag walo ka iban pa nga konsehal sang syudad.
Nagtambong man diri si Bacolod City Administrator Em Ang kag party member nga si Marlon Solidum.
Suno kay Leonardia, ang ila meeting ang nakasentro sa pagfinalize sang party slate kag pagfile sang Certificate of Candidacy (COC) sa maabot nga Oktobre.
Paathag sang alkalde nga tanan sa nagtambong ang gintugyanan nga makahambal.
Ang mga nagtambong ang nagpasalig sang ila desisyon kag commitment nga magpadalagan sa idalum sang banner sang Grupo Progreso.
Ginpanindugan man sang mga ini ang ila nagapadayun nga suporta sa plataporma, polisa kag programa sang partido.
Nangin bukas naman ang diskusyon kasubong man matawhay.
Samtang si Councilor Espino naman amo ang natabuan nga ulihi nga magahambal.
Matapos sang iya kahigayunan, nagsabat naman si Leonardia nga nag-umpisa sang malawig nga pagbayluhanay sang panan-awan kag opinyon.
Matapos ang indi paghangpanay sa isa ka sensitibo nga butang, boluntaryo naman nga naghalin si Espino apisar nga wala pa matapos ang meeting.
Dugang pa sang alkalde nga matawhay lang ang pag-exit sang konsehal, kun sa diin may natabo pa nga friendly fist bump sa tunga nila nga duha.
Nagpalab-ot man sang pagpasalamat si Leonardia kay Councilor Espino bangod sa pag-upod sini sang pila na ka tuig sa Grupo Progreso.
Apang indi man malikawan ang pagbag-o sa politika.
Paathag ni Leonardia nga boluntaryo ang nangin pagbulag ni Espino sa partido.
