Nagfile sang pila ka criminal case ang grupo sang mga doktor kag abogado batok kanday Philippine Health Insurance Corporation chief executive officer Emmanuel Ledesma Jr. kag anay Department of Finance Secretary kag karun Executive Secretary Ralph Recto angot sa pagsaylo sang P60 billion excess fund sang PhilHealth.
Madumduman nga gindeklarar na sang Korte Suprema nga void ang ginpagwa nga Memorandum Circular sang 2024 nga nagamando sa pagbalik sang excess funds sang mga government-owned and controlled corporations (GOCCs) sa National Treasury.
Suno kay Atty Rodel Taton, isa sa mga complainant, husto ang desisyon sang Korte Suprema bangod ang circular ang naga-amyendar sa mga existing law, kaangay sang PhilHealth law kag Universal Healthcare Act.
Pahayag sini nga P60 billion pa lamang ang nasaylo kag gingamit sa iban nga alokasyon, kag ini ang magadangat pa kuntani sa P89.9 billion kun wala napunggan.
Kadungan sa pagdeklarar nga void sa tikang, sila ang nagfile man sang kaso nga Technical Malversation, Graft, Plunder kag Grieve Misconduct.
Pahanumdom ni Taton nga santo sa Universal Healthcare Act, ang excess funds sang PhilHealth ang mahimo lamang magamit sa high-earning investment kag sa pag-imprubara sang coverage sang mga health programs.
Pahayag sini nga porsyon sang taripa gikan sa sigarilyo kag alcoholic beverages ang nagapondo sa Universal Healthcare Act, apang ang sobra nga pondo ang ginbalik lamang sa National Treasury, nga mahimo gingamit sa kontrobersyal nga flood control projects, ukon mahimo ginbakal na sang malahalon nga bags.
Indi man dapat gamiton nga excuse nga ‘in good faith’ ang ginhimo nga tikang bangod ini ang nakatuga sang dako nga epekto sa mga miyembro kag benepisyaryo sang PhilHealth.
Suno diri, kaupod sa mga nagfile sang complaint ang mga doktor nga nakakita sang makaluluoy nga sitwasyon sang mga pasyente nga nahatagan kuntani sang mas maayo nga benepisyo.
Dugang nga ginabatikos nila ang pagpabalik sa nadula nga P60 billion sa PhilHealth budget, apang ang itukap nga pondo ang magagikan man sa mga tax payers.
