Ginakwestyon sang General Alliance of Workers Association (GAWA) ang mahinay nga pag-aprubar sang wage increase sa Regional Wage Board.
Sa interview sang Bombo Radyo Bacolod kay GAWA Secretary General Wennie Sancho, dapat 60 ka adlaw matapos ang expiration sang ulihi nga wage order sang Setyembre maka-issue na sang panibag-o, kun sa diin subong nagapatigayon na kuntani sang consultation ukon hearing.
Suno diri, ang P35 nga wage increase nga ginpatuman sa National Capital Region ang nagaserbe sa karun nga barometer, kag indi na maglapaw indi kaangay sadto nga sila ang makapatuman pa sang P55 nga pagsaka sa minimum wage.
Paathag ni Sancho nga ini ang tuman ka gamay kag indi makabatak sa purchasing power sang publiko kag sa value sang piso nga padayun nga nagasarurot.
Pangabay sini nga pahulagon na ang pending House Bill para sa P100 Legislated Wage Increase nga napasar na sa 3rd and Final Reading, apang yara lamang gihapon sa House of Representative.
Aminado si Sancho nga ini na lamang ang ginasaligan nga dako-dako nga pagsaka sa sweldo bangod apisar indi mapasar ang P100, ginalantaw nga yara pa sa P70 tubtob P90 ang mapasar.
Suno diri, nga nagahangla ang mga mamumugon sa pagsaka sang sweldo ilabi na nga padayun ang pagsaka ang presyo sang gatong kag nagamahal man ang halos tanan nga mga balaklon.
Aminado man ini nga ang Regional Wage Board ang nagabase sa datos sang gobyerno nga tuman ka conservative kag unrealistic.
Suno kay Sancho sang siya ang kabahin pa sa Regional Wage Board sang Western Visayas ang datos ang masami sini nga ginakwestyon bangod ginapahayag sang gobyerno nga ang poverty threshold sang isa ka indibidwal ang yara lamang sa P70 kada adlaw.
Apang paathag sini nga sa karun sa pamilya nga may lima ka miyembro, kinahanglan nga tatlo diri ang minimum wage earners agud lamang makasustiner.
