Nagpatigayon sang protesta sa atubang sang opisina sang Central Negros Electric Cooperative ang pila ka mga grupo kag mga empleyado sang CENECO agud magpabutyag sang pagpamatok sa Joint Venture Agrement sang electric cooperative sa More Power.
Sila ang nagapanawagan man sang resignation ni Acting General Manager Atty. Arnel Lapore kag Board of Directors President Jojit Yap.
Suno kay Atty. Luke Espirito, chairman sang Bukulurang Manggagawang Pilipino, null kag void ang JVA bangud wala otoridad si Ceneco BOD President Jojit Yap sa pagperma sini.
Suno kay Espirito, indi dapat magmato-matao ang mga board of directors bangud ang electric cooperative ang ginapanag-iyahan sang mga member-consumers.
Suno diri, naghimo sang criminal act si Yap sa pagperma sang isa ka agreement nga wala siya sang otoridad kag dapat nagpangayo ini sang special power of attorney.
Ginakwestiyon man sini kun ngaa nagperma man ang More Power apisar nga wala sang otoridad si Yao.
Nagapati si Espirito nga ang mga politiko nga wala man sang kaangtanan sa CENECO kag nagasuporta sa JVA ang nagahimo sang proper arrangement paagi sa ila mga gahom agud masiguro nga matigayon ang joint venture agreement.
Suno sa iya, daw kaangay lamang nga sila ang nagagarantiya sang illegal nga kontrata.
Ginpabutyag man sang Presidente sang Responsible Supervisory and Confidential Union of Employees sang CENECO ang ila pagpamatok sa joint venture agreement.
Suno kay Leonard Guilaran, sang Lunes, nagpatawag si Atty. Arnel Lapore sang employee’s assembly kag didto, nagpresentar si More Power President Roel Castro sang ila proposal sa mga empleyado.
Suno kay Guilaran, ini ang labing una nga kahigayunan nga nag-atubang si Castro sa ila matapos napermahan ang JVA sang Sabado.
Didto man sini nakit-an kun ano ka-overwhelming ang opposition sang mga empleyado bangud suno diri, samtang nagahambal si Castro, wala gid sang may nagapalakpak.
Sila ang nakig-angot man sa ila mga kilala sa Iloilo agud tsekyaron ang serbisyo sang More Power kag ginkumpirmar sang ila mga kilala nga madamo sang power interruptions nga nagaluntad.
