Kampante ang Trade Union Congress Party (TUCP) partylist nga husto nga desisyon ang pagpili ni incoming President Bongbong Marcos kay Susan ‘Toots’ Ople bilang tiglikom sang Department of Migrant Workers.
Nahibaluan nga ang TUCP partylist ang author sa Kamara sang hagna nga nagtukod sang Department of Migrant Workers.
Suno kay Trade Union Congress of the Philippines (TUCP) spokesperson Alan Tanjusay, si Ople ang nagakaangay gid nga mangin tiglikom sang nasambit nga departamento bangud OFW advocate ini kag founder man sang Blas Ople Policy Center nga ginpangalan sa iya amay nga nagserbe man bilang labor secretary sa idalom ni former president Ferdinand Marcos Sr.
Lakip sa mga prayoridad ni Ople sa iya nga pagpungko amo ang pag-establish sang systems review nga magaprotect sa mga OFWs nagikan sa illegal recruiters.
Luyag man sini nga lantawon ang implementasyon sang Ease of Doing Business Act, pagsaka sang kontribusyon sa PhilHealth kag ang pagpatuman sang mandatory insurance nga mayor nga concern sang nasambit nga sektor.
Ini naman ang tion suno sa iya agud nga magpatuman ang gobyerno sang dignified approach sa migration governance agud mabatyagan sang mga OFWs nga sila ang gina-value.
Ginalantaw nga mangin maayo man ang koordinasyon sini kay incoming Labor Secretary Bienvenido Laguesma nga nagserbe bilang DOLE secretary sa idalom sang Estrada administration samtang si Ople naman ang nangin labor undersecretary sa idalom sang Arroyo administration.
