Nagapanawagan ang tagpamaba sang Bantay Bigas sa presidente sang Pilipinas nga gamiton ang kinamatarong sini sa pagsuspend sang excise tax, Value Added Tax kag oil deregulation law.
Sa interview sang Bombo Radyo Bacolod kay Cathy Estavillo, madugay na nga nagapanawagan ang mga mangunguma kag mangingisda nga mahatagan sila sang ayuda kasunod sang pagsaka sang presyo sang gatong kun sa diin nagaresulta man sa pagsaka sang presyo sang mga ginamit sang mga mangunguma kaangay sang abono.
Suno kay Estavillo ang mga balaklon ang lunsay nagasalalaka apang ang humay nga ila ginabaligya ang wala nagamahal.
Suno diri, ang mga cash aids nga ginapahayag sang gobyerno nga ihatag sa ila ang dapat nga gilayon nga ihatag na sa mangingisda kag mangunguma bangud madugay na nila ini nga ginapanawagan.
Nagapangabay man ini nga kuntani ang ayuda nga mabaton sang mga mangingisda kag mangunguma ang dako man, bangud tuman na kamahal ang mga nagapanguna nga balaklon.
Ginpahayag man sini nga dapat ang Department of Trade and Industry (DTI) ang magapatuman man sang price control.
Samtang ginpahayag man sang tagpamaba sang Bantay-Bigas nga madamo man sang wala nakabaton sang P5,000 nga cash aids nga nagikan sa sobra nga tax nga ginbayad sa rice importation.
Nahibaluan nga ginpahayag sang Department of Agriculture (DA) nga ang fuel subsidy para sa mga mangunguma kag mga mangingisda ang igapanagtag sa ulihi nga semana sang Marso ukon una nga semana sang Abril.
Suno kay Agricuture Assistant Secretary Noel Reyes, 162,000 ka mga corn farmers kag mangingisda ang makabenepisyo nagikan sa P500 million subsidy.
Ang kada benepisyaryo ang makabaton sang P3,000 kag ini ang ipanagtag paagi sa debit card.
Ang pahayag sang DA ang kasunod sang ginalauman nga big-time fuel price hike subong nga semana kun sa diin ang diesel ang magasaka sa P5.40 tubtob P5.50 kada litro samtang ang gasolina ang magasaka sa ₱3.40 tubtob ₱3.50 kada litro humalin sa Marso 8 tubtob 14.
Samtang nagpasiguro man ang Department of Energy nga ang ginamo sa tunga sang Ukraine kag Russia ang wala sang direkta nga epekto sa pungsod.
