Ginalantaw sang mga manunudlo sa syudad sang Bacolod nga wala pa sang kasiguraduhan ang pagbalik sang face to face learning sa bulan sang Enero santo sa ginpahayag sang presidente.
Madumduman nga sa ikalima nga State of the Nation Address (SONA) sang Lunes, gin-athag sini nga ginalantaw nga makabalik na ang face to face learning sa Enero tuig 2021 bangud mahimo nga may bakuna na sa bulan sang Setyembre.
Sa interview sang Bombo Radyo Bacolod kay Gualberto Dajao, presidente sang Alliance of Concerned Teachers-Negros Occidental Chapter, indi pa piho ang pahayag sang presidente nga ginabanta sa bulan sang Setyembre nga may vaccine na para sa coronavirus disease kag mahimo na ang traditional nga face to face learning.
Suno pa diri, indi man sila magpasugot nga magface to face learning samtang nagapadayon pa ang pagpakigbato sa coronavirus.
Samtang, nadry run na sang Department of Education-Bacolod City Division ang mga modules sa modular class, online learning kag radio base instruction.
Dapat man paminsaron sang gobyerno nga mahatagan sang budget ang mga manunudlo para sa pagbakal sang mga laptops para sa online learning kasubong man ang mga estudyante kag mga bondpapers para sa reproduction sang modules para sa modular learning suporta sa mga manunudlo kag estudyante sang gobyerno apang wala sini nabatian.
Ginpahayag man sini nga maayo man ang paggamit sang mga estudyante sang flash drive.
Ginkompirmar man sini nga naga-umpisa na sila sang reproduction sang modules para gamiton sa Agosto.
Ginpanawagan man ni Dajao nga dapat himuan sang paagi sang gobyerno nga mahatagan sang solusyon ang ginapangutubang nga problema sa pandemya.
