Pabor ang presidente sang Bacolod City Public School Teachers Federation nga gamiton ang lingwahe nga Filipino bilang medium of instruction sa mga buluthuan.
Ini ang kasunod sang panawagan sang ACT Teachers partylist kay President Ferdinand “Bongbong” Marcos Jr. nga himuon ang Filipino nga medium of instruction sa mga eskwelahan agud mas maintindihan sang mga estudyante ang ila mga lessons.
Suno kay Richard Gelangre, pabor ini sa nasambit nga panawagan apang may mga subjects naman nga dapat ipabilin lamang sa English kaangay sang Math kag Science.
Suno kay Gelangre, sarang naman nga magamit ang Filipino sa mga subjects nga History, Edukasyon sa Pagpakatao kag MAPEH ukon Music, Arts and PE.
Suno diri, kun gamiton ang Filipino, mas madasig ini nga maintindihan sang mga kabataan kag indi na kinahanglan pa nga itranslate.
Suno sa iya, nagagwa sa pagtuon nga mas nagataas ang pag-intindi sang mga estudyante kun native ang ila medium of instruction kag ang tanan nga regional languages sa karun ang gina-integrate na sa Filipino bilang national language.
Wala man ini sang may nagakakita nga konflikto sa paggamit sang English kasubong man sa paggamit sang foreign nga lingwahe sa iban nga mga buluthuan apang nagalaom ini nga paagi sa paggamit sang Filipino bilang medium of instruction, mas mapabakod ang grammar kag literature sang mga kabataan agud mapabakod man ang ila nationalismo.
