Nagapati ang presidente sang Bacolod City Public Schools Teachers’ Federation nga husto ang desisyon ni Vice President Sara Duterte nga magresign bilang miyembro sang Gabinete para sa ikalinong sang paminsaron sini.
Kahapon, nagresign si Vice President Sara Duterte nagikan sa Gabinete ni President Ferdinand Marcos Jr. matapos ang tensyon sa tunga sang ila pamilya sang nagliligad nga mga binulan.
Sa isa ka speech, ginpahayag ni Duterte nga siya ang nakigkita kay Marcos kahapon agud magfile sang resignation kag siya ang naghatag sang 30 ka adlaw nga notice agud masiguro ang nagakaigo nga matawhay nga transition para sa benepisyo sang mangin masunod nga tiglikom.
Suno diri, ang iya pagbiya sa pwesto ang indi bangud sa pagkahuyang kundi bangud sa matuod-tuod sini nga pag-ulikid sa mga manunudlo kag mga kabataan nga Filipino.
Suno sa iya, apisar nga indi ini magpadayon sa pagpamuno sa ahensya, magapadayon ini sa gihapon sa pagduso sang kalidad sang edukasyon nga nagakadapat sa mga Filipino.
Sa interview sang Bombo Radyo Bacolod kay Richard Gelangre, principal sang Bacolod City National High School, ang pagpanaog sa pwesto ni Duterte bilang tiglikom sang Department of Education (DepEd) kag Vice Chairperson sang National Task Force to End Local Communist Armed Conflict (NTF-ELCAC) ang ginkakibot sang mga manunudlo.
Ginpatpat ni Gelangre ang pila ka mga rason nga nagduso sa pag-resign sa gabinete sang bise presidente kag suno diri, nagsaka ang panawagan sa pagresign ni Duterte bilang DepEd secretary bangod nga wala man ini nagpakita nga ginakondenar sini ang paglagas sang China sa West Philippine Sea.
Dugang pa sini, ang DepEd dapat nagaprotekta sa mga kabataan apang wala man sang pagkondenar gikan kay Duterte sa kaso ni Kingdom of Jesus Christ leader Apollo Quiboloy sa pagpangmolestya sa mga kabataan.
Kasubong man nga ang DepEd nagapanindugan nga “Honesty is the best Policy”, apang wala man nakahatag sang liquidation sa paggamit sini sang P125 million sa sulod lamang sang 11 ka adlaw.
Dugang pa sini, bilang DepEd secretary wala gid ini nagpabor sa salary increase sang mga manunudlo.
Pahayag ni Gelangre, ang dapat nga ibutang bilang DepEd secretary ang nakaintindi sa Department of Education, sa mga manunudlo kag sa mga estudyante.
