Ginkalipay sang presidente sang Bacolod City Public School Teachers Federation ang madinalaga-on nga selebrasyon sang Teachers Day nga ginpatigayon sa SMX Convention Center Bacolod kahapon sang hapon.
Sa interview sang Bombo Radyo kay Richard Gelangre, iya ginkalipay ang maayo nga akomodasyon sa venue kun sa diin nag-enjoy kag nagbonding ang mga manunudlo sang ciudad sang Bacolod.
Suno diri, natigayon ang pagtililipon sa bulig kag suporta sang Department of Education- Division of Bacolod City sa pagpamuno ni Dr. Reynaldo Gico.
Ginhatagan man sang tion ang kapin sa 3,900 ka mga manunudlo nga magpakita ang ila mga talento sa pagsaot, pagkanta kag drama.
Nalakip man sa ila nga programa ang raffle draw kun sa diin nagbaton ang mga winners sang kwarta.
Yara man kahapon si Maximo Montero, chairman sang Region 6 Act Union, nga nagpasalig sa mga manunudlo nga iduso sini ang salary increase nga ila ginapangayo, ilabi na sa mga Teacher 1 nga kuntani magsaka sa P50,000 ang sweldo sa kada bulan.
Kasubong man nga ginmensyonar sini nga dapat mabaton sang mga manunudlo ang insakto nga benepisyo.
Ginalauman ni Gelangre nga mapalab-ot sa national government ang increase sa budget para sa edukasyon agud matigayon ang increase sa sweldo, makapatukod sang bag-o nga buildings, magprocure sang mga gamit para sa mga estudyante kasubong man nga marekober ang kapin sa 2 million ka mga estudyante nga wala nakapa-enroll.
Nanawagan man si Gelangre sa mga ahensya nga nagapangayo sang dako nga budget nga kun tani ini idugang na lang sa pondo para sa edukasyon.
