Ginpahayag sang chief executive officer sang Metro Bacolod Chamber of Commerce and Industry (MBCCI) nga ang pamunuan sang local government sa tatlo ka probinsya nga ginalakipan sang Negros Occidental, Negros Oriental kag Siquijor ang dapat mag-istoryahay para sa pag-uswag sang Negros Island Region.
Madumduman nga sang Hwebes, ginpirmahan na ni President Bongbong Marcos ang Negros Island Region Act.
Sa interview sang Bombo Radyo Bacolod kay Frank Carbon, dapat nga mag-estoryahay ang tatlo ka probinsya agud nga maplastar ang dapat nga himuon.
Suno diri, dapat nga maplastar sang mga opisyales ang plano para sa pagsanyog sang rehiyon.
Ginpahayag man sini nga bangud ang kalamay ang backbone sang ekonomiya sang Negros Island, dapat ang mga opisyales ang magapangita sang paagi kun paano mapatin-ad ang sugar industry.
Suno kay Carbon, ang masunod naman nga iplastar amo ang turismo bangud nagakinahanglan sang kwarta kag dako ang income nga makuha diri kag dako nga bulig sa ekonomiya.
Suno diri agud nga madevelop ang tourism, dapat kay-uhon kag siguruhon nga maayo ini kaangay sang Panglao, Bohol tuman kadamo ang magapadulong nga foreigners.
Samtang ginpahayag man nga ang importante man nga mapakay-o ang mga interprovincial roads halin sa Negros Oriental kag Negros Occidental agud nga mahapos ang pagpanaog sang mga produkto sang mga pumuluyo.
