Damgo lang para sa chief executive officer sang Metro Bacolod Chamber of Commerce and Industry (MBCCI) ang ginpahayag ni Finance Secretary Ralph Recto nga magadoble ang tuigan nga average nga income sang mga Pilipino sa masunod nga anum ka tuig ukon pag-abot sang 2030.
Sa interview sang Bombo Radyo Bacolod kay Frank Carbon, antes maghambal kuntani ang tiglikom sang Department of Finance nga magadoble ang income sang working class sa pungsod Pilipinas dapat athagon sini kun paano kag sa diin kuhaon ang increase.
Suno kay Carbon, kalabanan sang mga negosyo sa Pilipinas ang magagmay ukon Micro Business kag pila lamang ang mga dalagko nga kumpanya.
Suno diri, sa ginpahayag sang Department of Finance, dapat ang kumpanya ang magahatag sang increase sa sweldo sang P100 kada tuig agud nga pagabot sang anum ka tuig may P600 na nga increase ukon nagdoble na ang sweldo.
Bangud sini, indi ini masarangan sang mga magagmay nga mga negosyante bangud P30 tubtob P50 lamang ang masarangan sang mga ini.
Ginpahayag man sini nga dapat maayo ang dalagan sang ekonomiya kag maayo ang purchasing power sang mga pumuluyo bangud sa inflation kag mahuyang man ang piso batok sa dolyar.
Suno kay Carbon dapat may yara sang konkreto nga plano ang gobyerno kun paano marealisar ang pagdoble sang income sang working class kag dapat pamangkuton sila sa business sector bangud sila ang nakahibalo sang matuod nga sitwasyon sang negosyo kag empleyado.
