Para sa chief executive officer sang Metro Bacolod Chamber of Commerce and Industry (MBCCI), dapat kakason nalang bilang Presidential Adviser for Poverty Alleviation si Larry Gadon bangud sa pahayag sini nga imaginary lang man ang poverty ukon kapigaduhon sa Pilipinas.
Sa interview sang Bombo Radyo Bacolod kay Frank Carbon, dapat wala na gin-awardan ni President Ferdinand “Bong bong” Marcos Jr., agud mangin Presidential Adviser for Poverty Alleviation si Gadon bangud indi man ini makakita sang kapigaduhon sang mga pumuluyo.
Suno kay Carbon, wala nakahibalo si Gadon sang matuod nga sitwasyon sang mga tawo bangud wala man ini nagapanaog sa iya opisina agud nga makita ang sitwasyon.
Suno diri, ang matuod nga sitwasyon amo nga ginakulang ang income sang mga mamumugon kag ginakulang ang trabaho.
Kaangay lamang sang natabo sa natapos nga Panaad Festival sang Abril nga nanotisyaran gid nga nagnubo ang sales.
Suno kay Carbon, mismo ang gobernador ang nagtawag sa iya nga nagnubo ang sales.
Suno diri, ginhatagan niya sang duha ka rason ang gobernador kun ngaa nagnubo ang sales nga ginalakipan sang tuman nga kainit kag ikaduha, ang tawo ang nagkambyo sang spending habbits.
