Para sa Metro Bacolod Chamber of Commerce and Industry (MBCCI) apisar nga madugay pa ang tion antes mapasulod sa Pilipinas ang 672.3 million dollars ukon masobra P37 billion nga investment pledges nga nalikom ni President Ferdinand Bongbong Marcos Jr sa 30th Asia-Pacific Economic Cooperation (APEC) Economic Leaders’ Meeting sa San Francisco, California, importante diri amo nga may promisa na kag ini isa ka “One Step Forward” para sa pagsanyog sang Pilipinas.
Sa interview sang Bombo Radyo Bacolod kay Frank Carbon, Chief Executive Officer (CEO) sang MBCCI, pledges pa lamang ang nakuha sang presidente sa lakat sini kag wala pa sang pagpermahanay apang nagapati si Carbon nga ini makahatag sang paglaum sa Pilipinas sa pagsanyog sini ilabi na sa Agri- Food Security.
Apang, antes pa man magsulod ang investment sa Pilipinas dapat nga mahimos kag maplastar na ang pungsod agud mangin maayo kag padayon ang pag-invest sang mga dako nga mga pungsod diri.
Ginpatpat man sini ang tatlo ka major nga problema sa Pilipinas, ini ang tuman ka mahal kag kulang nga supply sang kuryente, manubo nga standard sang edukasyon, kag mga nagkalain-lain nga layi humalin sa national, padulong sa probinsya tubtob sa kaciudaran kag kabanwahanan.
Isa pa panawagan ni Carbon nga kun tani ang mga milyonaryo nga mga negosyante nga mga Pilipino ang mag-invest diri sa Pilipinas kag indi sa luwas sang pungsod agud mabuligan sa pag-uswag sang Pilipinas.
Phayag ni Carbon, ang importante amo nga may yara na sang pledges ukon promisa nga bisan madugay pa ang pagsulod sang investment sang mga dako nga mga pungsod sa Pilipinas, may yara na sang One Step Forward sa pagsanyog ang industriya sang Pilipinas.
