Ginakonsiderar sang grupo sang mga negosyante sa Bacolod ang pagpangayo sang temporaryo restraining order batok sa implementasyon sang wage order nga magapasaka sang minimum wage sa Region 6.
Kahapon, gin-endorso na sang Regional Tripartite Wages and Productivity Board (RTWPB) sa National Wages and Productivity Commission ang tubtob sa P450 daily minimum wage para sa mga nagatrabaho sa private establishments sa Western Visayas.
Para sa non-agricultural/ industrial/commercial nga may yara sang masobra 10 ka mga empleyado pasaka, ang minimum rate ang mangin P450 nagikan sa P395; samtang mangin P420 naman ang sweldo sang may 10 ka empleyado panubo.
Ang minimum wage rate para sa mga agricultural sector naman ang mangin P410 nagikan sa P315.
Sa interview sang Bombo Radyo kay Frank Carbon, chief executive officer sang Metro Bacolod Chamber of Commerce and Industry, wala napaminsaran sang maayo ang nadesisyunan nga wage hike.
Suno kay Carbon, indi makasarang ang magagmay nga negosyante sa dugang nga galastuhan gani may posibilidad nga sila ang manira nalang kun wala na sang inugsweldo.
Sa karon suno kay Carbon, wala pa man nakalab-ot sa 50 porsyento ang ginsaka sang presyo sang mga balaklon kag liwat naman ini nga maganubo kun nakabangon na nagikan sa COVID pandemic kag natapos na ang gyera sa Ukraine.
Panindugan sini, kuntani ikonsiderar sang Regional Wage Board ang kapasidad sang mga negosyante nga magbayad ilabi nga kalabanan nga negosyo sa Western Visayas ang micro kag small enterprises.
