Kadungan sang malaba nga pila sang mga motorista kahapon agud nga makabakal sang mas barato nga gatong bangod sa pagsaka subong nga aga, ginpahayag naman sang Chief Executive Officer sang Metro Bacolod Chamber of Commerce and Industry (MBCCI) nga isa lang ka gab-i ang mangin kalipay sang mga gasolinahan.
Sa interview sang Bombo Radyo Bacolod kay Frank Carbon, kasunod sang mataas nga demand sang krudo kag gasolina kahapon, ginalauman na sini nga halos tanan nga mga negosyante kalakip na ang mga gasoline stations ang magawiit bangod sa epekto sang tuman nga pagmahal sang petroleum products.
Pahayag pa sang negosyante nga karun lang ini naka-eksperyensya nga nagdangat sa P5 ang pagsaka sang presyo sang gatong, nga ginalantaw naman sini nga magatuga sang domino effect.
Suno kay Carbon, kalakip sa nagapanguna nga apektado amo ang transportation sector nga haluson nalang makaganansya bangod ang ila nga makita sa isa ka adlaw ang haluson magakadto nalang sa krudo.
Kasunod sini, magasaka naman ang presyo sang pagkaon.
Dugang pa ni Carbon nga may posibilidad man nga magsaka ang sukot sa kuryente bangod magasaka man ang bili sang coal ilabi na nga 70 porsyento sang kuryente sa Visayas ang gikan sa coal powerplant nga naga-operar paagi sa krudo.
Mahimo man nga magsaka ang sukot sa tubig bangod ang pumping stations ang naga-operar man paagi sa krudo.
Apisar sa tuman nga pagsaka sang presyo sang gatong, ginalantaw sang mga ini nga magasaka pagid ini sa masunod nga senimana.
Dugang pa nga indi matumod kun san-o matapos ang gyera sa tunga sang Russia kag Ukraine.
Nagalaom si Carbon nga may contingency plan ang national kag local government agud nga indi tuman nga magmahal ang mga pagkaon.
Aminado man ang negosyante nga mabudlay ini para sa mga pumuluyo nga amat-amat palang kuntani nga nagabangon gikan sa halit nga gintuga sang COVID-19 pandemic.
Pahayag sini nga nagapinsar na kuntani ang mga ini sang mga buluhaton para sa economic recovery kag amat-amat na nga nagatipon sang capital agud nga makabukas na ang madamo nga mga negosyo kag makadugang sang ihire nga tawo.
