Patay ang 15 anyos nga lalaki matapos nabun-an sa nagluntad nga riot sang mga pamatan-on sa palibot sang Bacolod City Government Center kapin alas-8:00 kagab-i.
Ang biktima ang ginkilala kay Joshua Torres, Grade 8 student, residente sa Purok 4, Barangay 41, Bacolod City.
Sa karun wala pa matumod ang rasun sa nagluntad nga kinagamo.
Gilayon naman nga ginpangsikop sang mga kapulisan ang imbulbado sa insidente samtang ang bangkay sang biktima ang yara sa karun sa Corazon Locsin Montelibano Memorial Regional Hospital.
Ginabanta nagadangat sa kapin 10 ang mga kabataan nga gindala sa Bacolod Police Station 4 para sa interrogation.
Magluwas sa kabataan, wasak man ang windshield sang isa ka jeep nga ginhalitan sang mga kabataan.
Gina-alegar nga ang jeep amo ang ginasakyan sang grupo sang nakabuno sa 15 anyos.
Pahayag sang iloy sang biktima nga wala na nagpakilala, nga sa likod ang pilas sang bata kag ginalantaw nga naigo ang corazon sini.
Suno sa iloy mainabyanon ang iya nga bata apang wala siya ihibalo nga ini ang naga-upod nsa riot.
Dugang pa sini nga masami man sini nga ginasaway ang iya nga bata.
Panawagan sini nga mapriso ang suspetsado kag luyag sini nga kun kabuhi ang ginkuha dapat amo man ang ibayad.
Pahayag naman ni Ronald Badajos, residente sa Barangay Taculing, Bacolod City nga nagpadulong ini sa Bacolod Police Station 4 matapos makabatun sang impormasyon nga kalakip ang iya 15 anyos nga bata nga babayi sa mga gindakop.
Natingala naman ini bangod wala siya sang nahibaluan nga may grupo ang iya nga bata nga incoming Grade 9 student.
Santo sa amay, naglisensya ang iya nga bata nga magasimba ini kaupod sa mga abyan apang natingala nalang ini nga nagab-ihan na wala gihapon makapuli ang iya nga dalaga.
Nakaangkon naman sang lagob sa likod ang iya nga bata bangod sa riot.
Ginalantaw sini nga mahimo nga nadalahig lang ang iya nga bata sa insidente.
Ginpasalig man sang amay nga iya pagalaygayan ang iya nga bata, kag magaserbe na nga leksyon ang hitabo kun ini ang wala nagapamati.
