Ginakalipay sang Presidente sa Bacolod City Public School Teachers Federation ang pagratify sa hagna nga nagapasaka sa Teacher Supply Allowance sa P7,500 gikan sa karun nga P5,000.
Sa interview sang Bombo Radyo Bacolod kay Richard Gelangre, ginakalipay sini nga yara na sa Office of the President ang House Bill 9622 nga gin-autor ni ACT Teachers partylist Representative France Castro.
Sa karun ginahulat nalang nga ini ang mapirmahan ni President Ferdinand “Bongbong” Marcos Jr. agud mangin opisyal na nga kasuguan.
Sa hagna ang subong nga P5,000 nga Teacher Supply Allowance ang pasakaon sa P7,500 sa Academic Year 2024-2025 samtang magasaka naman sa P10,000 sa Academic Year 2025-2026.
Ini ang ginapakamaayo ni Gelangre bangod aminado ini nga kulang ang Maintenance and Other Operating Expenses (MOOE) sang eskwelahan para sa paghatag sang teaching supplies sang mga manunudlo.
Sadto ang ginahatag amo ang Chalk Allowance lamang gani ginapakamaayo man sini nga ginhimo na nga Teacher Supply Allowance, apang nalakip na sa budget ang para sa load allowance sang mga manunudlo.
Ginapangabay ni Gelangre nga gilayon nga mapirmahan kag mangin layi ang hagna, apang suno diri sa tion nga indi mapirmahan, may ara sang timeline kun sa diin ini ang automatic nga mangin kasuguan magluwas lamang kun i-veto sang presidente.
Ginapakamaayo man sang mga ini nga nakuha na ang intelligence fund nga wala mahibaluan kun diin magakadto sa baylo, maathag nga makita nga ang pondo ang nagkadto as Teacher Supply Allowance.
Paathag ni Gelangre nga expanded family na ang pagkabig sang mga manunudlo sa ila mga estudyante kun sa diin sa tion nga sila ang may makita nga kakulangan, ang manunudlo na mismo ang nagahatag.
Pahayag sini nga importante nga pasakaan man ang benepisyo kag sweldo sang mga manunudlo, agud indi makaangkay sa mga nurses nga tuman ka damo na ang ginapili nga magtrabaho sa luwas sang pungsod.
Paathag ni Gelangre nga indi ang magahatag sang kabudlayan bangod sila ang magatrain naman sang panibag-o nga mga manunudlo.
Suno diri, ang Teacher Supply Allowance ang masami ginahatag isa ka bulan antes ang opening sang klase.
