Wala nagapati ang presidente sang United Sugar Producers Federation (UNIFED) nga indi mahimo makapatigayon sang cloud seeding ang Bureau of Soils and Water Management (BSWM) bangud wala sang seedable clouds sa probinsya sang Negros Occidental kag sa kahangawa nga maguba ang produksyon sang paho sa San Carlos City kag Guimaras.
Sa interview sang Bombo Radyo Bacolod kay Manuel Lamata, indi rason ang wala sang seedable clouds sa indi makapatigayon sang cloud seeding bangud may yara ang mga ini sang gal-om nga makita kasubong man ang pagkaguba sang produksyon sang paho sa San Carlos City kag Guimaras bangud diutay lang ang planters.
Suno pa diri, mas importante ang bugas kag kalamay gani dapat unahon sang Department Agriculture sa paghatag sang solusyon ang problema sang rice kag sugar farmers.
Gintawag man sini nga taman ang mga personnel sang BSWM bangud nga wala ang mga ini nagatrabaho agud nga mahatagan sang solusyon ang problema sang mga mangunguma.
Suno diri, dapat indi lang kutob sa paghatag sang advisories ang mga ahensya sang gobyerno bangud kinahanglan man sang mga ini nga maghimo sang tikang agud nga masolusyunan ang problema.
Ginkwestyon man sini ang pagpaganot sa pagpatigayon sang cloud seeding sang gobyerno bangud may yara man sang budget sa pagpatigayon sini.
Suno kay Lamata, kun indi man lang makahimo sang ila mga katungdanan sa trabaho ang mga personnel sang Bureau of Soils and Water Management (BSWM) maayo pa nga ini ang pang-islan.
Samtang nagpanawagan man ini sa provincial government sang Negros Occidental nga magbakal sang eroplano agud nga ang probinsya na mismo ang magapatigayon sang cloud seeding kung kinahanglanon kag indi na maghulat pa nga ang BSWM pa ang maghimo sini.
