Indi pabor ang grupo sang mga taxi drivers sa plano nga pagbutang sang transport route para sa electric jeepneys sa Bacolod Negros Occidental Economic Highway (BANOCEH) gikan sa Barangay Sum-ag tubtob sa Silay City.
Sa interview sang Bombo Radyo Bacolod kay Ronald Allan Pelaez Salgado, leader sang Samahan ng mga Taxi drivers sa Bacolod, nagpadala na sila sang sulat kay Councilor Atty Dindo Ramos, chairperson sa committee on Transportation sa Sangguniang Panlungsod sang Hulyo 9 pa lamang.
Ini sa pagpamatok nga sudlan sang e-jeep ang BANOCEH sa panindugan nga ini ang may dako nga epekto sa ila ikasarang nga maka-income.
Panawagan nila nga magpatigayon anay sang public hearing agud mabatian man ang ila concern.
Nahibaluan nga sa SP session, nagpasar ang paghimo sang favorable endorsement sa pagpresentar sang plano sa Land Transportation Franchising and Regulatory Board (LTFRB).
Ini ang wala na ginpalabay sa public hearing bangod wala man sang transport route nga maapektuhan indi kaangay sa iban nga routa nga ginpropose, nga may nagabyahe nga tricycle.
Pahayag sini nga sa 100 porsyento sa sadto nga kita, 30 porsyento na lamang ang nabilin sa ila, kag ini ang ginatungaan pa nila sa mga tricycle drivers.
Suno diri, kun isa ka libo ang ila arkila sa kada adlaw kag napulo lang ang ila pasahero, resto pa ang mga ini.
Panawagan nila nga pamatian man ang ila concerns indi nga gilayon nalang aprubahan ang request sang pribado nga kapitalista.
Panindugan pa sini nga kun kis-a nagasugot na gid lamang ang mga taxi drivers nga buksan ang ila metro para sa mga pasahero padulong sa Bacolod-Silay Airport agud lamang sila ang masakyan.
Apang kun may e-jeep na nga magabyahe padulong sa airport, dako ang madula sa ila nga pasahero.
Hingyo sini nga sila ang pamatian bangod may-ara man sila sang pamilya nga ginapakaon kag kabataan nga ginapa-eskwela.
