Ginahulat pa gihapon ang approval sang Land Transportation Franchising and Regulatory Board (LTFRB) sa petition sang mga taxi operators nga dugangan ang flag down rate.
Ang petition ang ginfile sang taxi operators sang bulan sang Hunyo kasunod sang wala untat nga pagsaka sang presyo sang produktong petrolyo.
Bwas nga adlaw, Martes, Hulyo 12, maganubo sang P5.70 ang presyo sang kada litro sang gasolina; P6.10 sa kada litro sang diesel samtang P6.30 naman ang iganubo sang kada litro sang kerosene.
Sa interview sang Bombo Radyo kay Mario Eusebio, presidente sang Taxi Operators in Negros Occidental, nagapasalamat sila nga bisan paano, may yara sang rollback sa gasolina kag diesel bwas sa aga kadungan sang paglaom nga kuntani ini ang magatayuyon.
Sa karon, wala nakabaton sang ayuda ang taxi drivers kag operators sa Negros Occidental,
Suno kay Eusebio, dako kuntani ang bulig sang ayuda bangud duha ka tranche ang hatagay sini.
Tinalikdan nga bulan, nagpatigayon na ang LTFRB Region 6 sang hearing angot sa flag down rate increase nga ila ginfile kag aprubahan pa ini sang LTFRB Central Office.
Naghingyo ang mga taxi operators nga dugangan lang sang P10 ang flag down rate apang indi na pag-ipacalibrate ang metrohan.
Suno kay Eusebio, mahal ang gasto sang operator kun may yara sang calibration bangud nagabayad sa LTFRB kada unit samtang may mga metrohan man nga indi na pwede marecalibrate kag kinahaglan islan.
Ang isa ka metrohan ang nagabili sang P10,000 tubtub P15,000.
