Aminado ang mga taxi drivers sa syudad sang Bacolod nga nakabawi sila matapos nga magpatigayon sang People’s Holiday ang public utility jeepney (PUJ) drivers kahapon.
Sa interview sang Bombo Radyo kay alyas Josel, nagaupod sila sa kawsa sang mga nagpatigayon sang strike apang nagpadayon sila sa pagbiyahe bangud ini ang mando sang ila nga management ilabi na nga ang ila nga taxi units nga ginamaneho ang may-ara sang kontrata.
Ginpahayag man sini nga pribilihiyo na sa ila nga wala ginpauntat sang management sang taxi ang byahe sa pihak sang panawagan nga transport strike.
Ginbanggaan man sila kahapon sang mga driver nga naguntat biyahe apang gindulugan lamang nila ini kag nagpahayag nga sila man ang nagasimpatiya sa kawsa.
Samtang, ginpahayag man ni Jun Paul Mitan, isa man ka taxi driver, nakaginansya sila kahapon bangud wala sang PUJ nga nagbiyahe.
Wala man sila nagpakigbahin sa strike apang nagasimpatiya ang mga ini sa kawsa bangud indi man maagwanta ang pagsaka sang presyo sang gatong.
Suno kay Mitan, kulang pa ang roll back sa presyo sang gatong gani panawagan sini nga dugangan pa ang roll back.
Nahibaluan nga epektibo kaina sang aga may yara sang ginpatuman nga rollback sa presyo sang produktong petrolyo nga P5.45 sa kada litro sang gasolina; P11.45 sa litro sang diesel kag P8.55 sa litro sang kerosene.
Ginpahayag sang presidente sang Taxi Operators in Negros Occidental (TONO) nga nagasimpatiya sila sa kawsa sang mga driver nga nagpatigayon sang People’s Holiday, apang nagpadayon sila sa pagbiyahe bangud ang ila nga mga drivers ang nagapaninguha man bangod pigado pa ang ila nga pagbiyahe.
Sa interview sang Bombo Radyo Bacolod kay Mario Eusebio, una na sila nagpahayag nga indi sila makigbahin sa patigayunon nga transport strike apisar nga sila ang apektado man sang pagsaka sang presyo sang gatong.
Nagapati si Eusebio nga indi madala sa transport strike ang pagpanubo sang presyo sang produktong petrolyo.
Ginlantaw man sini nga nangin madinalag-on ang pagpatigayon sang People’s Holiday sang mga drivers sang public utility jeepney (PUJ) sa syudad sang Bacolod kahapon.
Ginkasubo man sini nga may yara sang reported nga lalisanay kag pagtampaanay nga natabo sa tunga sang mga drivers nga nagpatigayon sang strike kag sang mga taxi drivers, apang pasalig sini nga ini ang naareglo man sang mga operators kag drivers.
Ginpahayag man sini nga wala man sila nagkulang sa pagpahanumdom sa mga taxi operators nga panugyanan ang mga taxi drivers nga indi mag-agi sa rally centers agud nga indi man mainsultuhan ang mga nag-untat biyahe.
Nagpangayo man ini sang pasaylo sa tanan nga mga commuters nga naapektuhan sang transport strike kahapon.
