Nagakatabo na ang ginakahangawa sang business sector nga epekto sang kurapsyon sa Pilipinas.
Sa interview sang Bombo Radyo Bacolod kay Metro Bacolod Chamber of Commerce and Industry Chief Executive Officer Frank Carbon, alarming ang pagpahayag sang South Korea nga pagpa-untat sang 700-billion won ukon kapin P28-billion infrastructure loan project sang Pilipinas.
Kabahin sa proyekto ang pagtukod sang 350 ka mga taytay kalakip na ang Panay-Guimaras-Negros bridge.
Suno kay Carbon, nagakahangawa ang South Korea nga ang bulig ang magakadto lamang sa kurapsyon.
Pahayag sini nga sa Economic Development Cooperation Fund (EDCF), ang soft loan ang wala na ginasukot bilang bulig sa mga pigado nga pungsod nga kabahin sa Association of Southeast Asian Nation (ASEAN).
Sa karun, deficit spending na ang Pilipinas, bangod kuntani ang ginagant nga loans ang makatukod sang mga infrastructure projects nga makagenerate sang income.
Apang bangod madamo sang wala nagakahuman, mas dako pa ang gastos sangsa nagakaganar nga income, gani indi mabayaran ang utang.
Suno diri, may projection na si Finance Secretary Ralph Recto nga ang P16 tubtob P17 trillion nga utang, ang mahimo magtimbook sa P20 trillion sa 2028.
Ginakahangawa sang business sector nga luwas sa South Korea, maga-untat naman sa pagbulig ang Japan, India kag iban pa nga kaingod nga mga pungsod bangod sa nakita nga malala nga kurapsyon.
Dugang pa sini nga mahimo indi naman magpautang ang World Bank, kag iban pa nga International Financial Institution bangod sa malain nga image sang Pilipinas.
Paathag ni Carbon nga maayo ang utang kun ini ang ginagamit sa investment ukon mga butang nga makaganar sang income.
Kuntani paagi sa matukod nga mga infrastructure projects, magasanyog ang ekonomiya kag magadako ang income sang gobyerno, nga makasarang magbayad sang utang kag madamo pa sang mabilin para sa pagpaayo pa sang kabuhi sang mga Pilipino.
Apang sa karun, nagadako lamang nga nagadako ang utang sang Pilipinas bangod sa kurapsyon.
Nagalaom ini nga mapangtumod kag mapapas sang independent investigative body ang kurapsyon sa executive kag legislative department agud madula na ang kahangaw sang mga lenders.
