Ginpahayag sang Chief Executive Officer sa Metro Bacolod Chamber of Commerce and Industry (MBCCI) sa mga regulatory body sa power industry nga maghatag sang paathag sa dululungan nga forced outages sang 31 ka mga power plants sa Luzon kag Visayas.
Ini kasunod sang deklarasyon sang National Grid Corporation of the Philippines (NGCP) sang red alert status sa pila ka bahin sang Luzon kag yellow alert sa Visayas.
Sa interview sang Bombo Radyo Bacolod kay Frank Carbon, dapat pamangkuton ang NGCP, Department of Energy (DOE) kag National Electrification Administration (NEA) ang nagaserbe nga regulatory body sang power industry kun ano ang rasun kun ngaa dulungan ang forced outages sang 19 ka mga power plant sa Luzon kag 12 ka power plant sa Visayas.
Ini ang luwas pa sa mga planned outages sang iban nga planta sang kuryente.
Bilang operator sa shipping industry, ang mga passenger vessels ang kada tuig nagapatigayon sang dry dock samtang kada duha ka tuig naman sa mga cargo vessel.
Pahanumdom sini nga dapat amo man sa mga planta sang kuryente, nga kaangay nga wala man lang sang regular check-up.
Dugang pa sini nga dapat maghimo man sang solusyon ang mga regulatory body kun paano malikawan ang kaangay nga sitwasyon.
Luyag man sang mga ini mahibaluan kun pila ang excess nga power load sa Mindanao, bangod operational na ang Mindanao-Visayas connection, nga ang nagapanguna nga purpose amo ang maka-augment hinali nga kulangon ang kuryente.
Suno diri, ang power supply sa Visayas ang masami ginapadala sa Luzon kun kulang ang supply bangod mas dako ang gross domestic product (GDP) value sa Luzon.
Kun ini ang matabo, ginalantaw ni Carbon nga sa masunod, indi na lamang rotational brown-out ang patigayunon sa Visayas kundi blackout na, bangod ang power supply ang ginapadala sa Luzon.
Ini ang dapat na nga kabalak-an suno sa negosyante bangod kita ang yara sa summer season, kun sa diin mas mataas ang demand sa kuryente.
Aminado ini nga sa karun kulang gid katama ang power supply sa Western Visayas kag indi makasustiner sa nagasanyog nga ekonomiya.
Ginaduso man nila nga makatukod sang embedded baseload plant apang aminado si Carbon nga ang mabudlay nga proseso amo ang nagapugong sa mga investors nga magsulod sa power industry.
Suno diri, nagakinahanglan sang masobra 130 ka signature gikan sa nanarisari nga ahensya antes maka-operar ang isa ka generating power plant sa Pilipinas.
