Ginpasalig sang chief executive officer sang Metro Bacolod Chamber of Commerce and Industry nga indi apektado ang sektor sang negosyo sa away sa tunga sang Presidente kag Bise Presidente sang pungsod.
Sa interview sang Bombo Radyo Bacolod kay Frank Carbon, umpisa palang maathag na nga gingamit lamang si Vice President Sara Duterte bilang partner for convenience agud makuha ni President Ferdinand “Bongbong” Marcos Jr. ang boto sa Mindanao.
Ini bangod matapos ang pagdaog, isa-isa naman nga ginpangpukan ang mga kaalyado sang Duterte kaangay sang pagpahalin kay former Senate PresidentJuan Miguel “Migz” Subere kag ginbuslan ni Senate President Francis “Chiz” Escudero, nga die hard supporter sang Marcos gikan pa sa amay sini.
Sa pagpanguna ni House Speaker Martin Romualdez kag ni Escudero, yara na sa kamot ni Presidente Marcos ang mayorya sang Senado kag Kongreso samtang itsapwera naman si Duterte bangod naserve na sini ang purpose.
Suno kay Carbon, maathag na sa business sector ang pagbalik sang cronies sang Marcos nga amo ang nagakapot sa mga major vital industries sa pungsod kaangay sang kuryente, tubig, dalan kag iban pa.
Sa pihak sini, pasalig sang negosyante nga ang commerce industry ang isolated sa political scenario kag naplastar na kun paano nga indi maapektuhan apisar sa away sang duha ka pinakamatag-as nga opisyal sang pungsod.
Samtang ang away sang mga opisyal sa national government ang indi man maka-apekto sa foreign investors bangod ang mga ini ang nakatutok lamang sa local commerce kag sa mga nagapamuno sa isa ka lugar.
Paathag ni Carbon nga ang investors ang nagalantaw sa pamunuan sang mga alkalde ukon gobernador, sa ila pamalakad, peace and order kag iban pa nga aspeto kag wala sang labot sa national politics.
