Nagalaom ang United Sugar Producers Federation ukon UNIFED nga tsekyaron sang mga ahensya ang tanan nga bodega nga ginataguan sang kalamay nationwide.
Suno kay UNIFED President Manuel Lamata, dapat nga wala sang pinilian ang mga ahensya sang gobyerno bangud nagaagunto ang mga konsumidor sa tuman kataas nga presyo sang kalamay.
Suno kay Lamata, dapat nga unahon ang mga central bangud mahimo nga sila ang nagatago man sang kalamay.
Indi malipod suno sa iya nga trader man ang nagapanag-iya sang central gani indi madula ang posibilidad nga may yara sang kalamay sa mills.
Kun may bilin nga kalamay sa mga central suno kay Lamata, sarang ini makumpiskar sang gobyerno kag makasuhan sang hoarding kag economic sabotage.
Suno kay Lamata, nagpasa sila sang impormasyon angot sa ginataguan sang kalamay kag ang Sugar Anti-Smuggling Organization mismo ang nagpasa sini sa Bureau of Customs.
Sang weekend, nagsapol ang bag-o nga commissioner sang BOC kag nagpangayo sang bulig agud nga matapna ang sugar smugglers.
