Wala nakatuga sang huol sa mga commuters ang pagpatigayon sang Bacolod Alliance for Commuters Operators and Drivers (BACOD) sang Protest Caravan, bangod ini ang makadali lamang.
Sa interview sang Bombo Radyo Bacolod kay BACOD President Rudy Catedral, ang protest caravan ang ila nga tikang sa pag-suporta sa untat-byahe sang ila National federation nga MANIBELA sa Luzon.
Kun sa diin masobra 400 ka mga jeepney drivers ang nag-upod sa Protest Caravan kaina gikan pa sa nagkalainlain nga routa.
Ang mga jeepney drivers kag operators ang nagtipon sa Araneta Street sa atubang sang Bacolod Old Airport sa Brgy Singcang-Airport halin alas-9:00 tubtob alas-10:00 sang aga, samtang ang protest caravan nga naglibot sa Bacolod City Public Plaza alas-10:00 tubtob alas-11:00 kaina sang aga.
Ang tikang ang ginhimo bilang pagpamatok sa padayun nga pagsaka sang presyo sang gatong, kun sa diin, sa karun nagadangat na sa P92 ang kada litro sang Diesel.
Suno kay Catedral, indi na masarangan sang mga drivers kun magdangat sa P100 ang presyo sang gatong.
Panawagan nila sa gobyerno ang patas nga paghatag sang 20 percent fuel discounts sa nakaparehistro man ukon wala nga mga public utility drivers.
Ini bangod sa anunsyo sang Department of Transportation, ang makabatun lamang sang fuel discount amo ang mga modernized jeepneys.
Nagkoordinar man sila sa ciudad agud magiyahan sang traffic enforcers sa aktibidad.
Pasalig ni Catedral nga wala sila sang plano nga magtuga sang kinagamo, sa baylo luyag lamang nila nga mabatian sang gobyerno ang ila nga mga panawagan.
Matapos sang protest caravan, sila ang nagbalik man sa pagbyahe.Samtang, ginpanawagan sang grupo sang unconsolidated traditional jeepney drivers kag operators kay Energy Secretary Sharon Garin nga magpanaog na sa pwesto.
Sa pagtipon sang masobra 400 ka mga jeepney drivers sa idalom sang Bacolod Alliance for Commuters Operators and Drivers (BACOD) – Manibela, isa sa nakabutang sa ila karatula ang pagkondenar kay Garin.
Sa interview sang Bombo Radyo Bacolod kay BACOD-Manibela President Rudy Catedral, indi sila kumpormi sa pahayag ni Garin nga wala na ini sang mahimo sa pagsaka sang presyo sang gatong.
Panindugan ni Catedral nga kun wala sang mahimo si Garin bilang tiglikom sang Department of Energy, nagakahulugan lamang nga siya ang wala sang pulos sa pwesto.
