Liwat naman nga magapatigayon sang duha ka adlaw nga rally-protesta ang mga transport groups nga nagagamit pa sa karun sang traditional jeepney sa maabot nga Nobyembre 29 tubtob 30.
Sa interview sang Bombo Radyo Bacolod kay Rudy Catedral, presidente sang Bacolod Alliance of Commuters, Operators and Drivers (BACOD) padayon sila nga nagapanindugan nga indi magsulod sa consolidation bangud madamo ang nagsulod sa kooperatiba nga naghinulsol bangud halos tatlo ka tuig na wala sa gihapon ang mga ini sang dividend.
Dugang pa, madamo ang wala nakabayad sang interes kag unit sa mga bangko bangud mahal ini kag ginpahayag man sini nga madamo sang mga kooperatiba nga manugsira na.
Nagapanawagan man si Catedral nga ma-renew liwat ang prangkisa kag marehistro ang mga PUJ bangud nagapati sila nga madamo sang maapektuhan nga commuters bangud indi pa bastante ang mga unit sang mga modernized jeepneys nga naga-biyahe sa syudad.
Samtang nagpahayag naman sang pagka-dismaya ang nasambit nga grupo sa LGU kalakip ang Committe on Transporation bangud gina-alegar bungol kag bulag ini sa gakalatabo.
Nagapati man si Catedral nga may kapasidad si Bacolod City Mayor Albee Benitez nga magpa-ubra sang isa ka moratorium ukon temporary nga ipa-renew liwat ang mga prangkisa sang traditional jeepney.
Dugang pa ni Catedral nga kun may matabo nga pagpanakop kadungan sang pagpatigayon sang mga ini sang rally-protesta, nmagapatigayon ang mga ini sang transport strike.
