Indi magpasaka sang pletehan ang grupo sang mga traditional jeepney drivers sa ciudad sang Bacolod apisar pa ipatuman sang Land Transportation Franchising and Regulatory Board (LTFRB) ang P15 minimum fare hike.
Sa interview sang Bombo Radyo Bacolod kay Bacolod Alliance of Commuters, Operators and Drivers (BACOD) – Manibela President Rudy Catedral, imbes nga pasakaan ang plete, mas dapat nga himuan sang tikang sang gobyerno ang asod-asod nga pagsaka sa presyo sang gatong.
Aminado ini nga mabudlay dulaon ang VAT kag excise tax nga ginadagdag sa produktong petrolyo, apang ginapanawagan sang mga nga kun mahimo mapanubuan agud magpanaog man ang presyo.
Panindugan ni Catedral nga apisar apektado ang mga drivers kag operators sang nagasaka nga presyo sang gatong, mas pakamaayuhon na lamang nila nga sila ang magapas-an sangsa dugangan ang pag-antos sang mas madamo nga mga commuters.
Dugang pa sini nga indi nagakadapat nga pasakaan ang pletehan samtang wala man nagasaka ang sweldo sang mga trabahante.
Suno diri, sa kada adlaw yara sa 18 litros sang krudo ang makonsumo sang traditional jeepneys kag tuman ka dako kun tingubon ang nagakadto nga kita sa krudo bangod sa masobra piso nga mga fuel price increase samtang sentimo lamang kun magpanaog sang presyo.
Kun sadto ang mga drivers ang makapauli sang P500 kada adlaw, sa karun yara na lamang sa P300 ang mapauli sang mga ini sa ila pamilya.
Nagapangayo man sila sang paghangop bangod madamo sa mga drivers ang ginapili nga magpila sa terminal kag ginapapuno gid ang pasahero, bangod ini na lamang ang ila pamaagi nga makabawi.
