Maga-upod ang pila ka grupo sang traditional jeepneys sa tatlo ka adlaw nga Nationwide Transport Strike sang National Transport Group nga MANIBELA sa Lunes, Marso 24 tubtob Myerkules, Marso 26.
Sa interview sang Bombo Radyo Bacolod kay Bacolod Alliance of Commuters, Operators and Drivers (BACOD) President Rudy Catedral, bangod sila ang affiliate sang Manibela, maga-upod sa untat-byahe ang 526 nila ka units sang traditional jeepneys.
Ginalantaw sini nga mahimo maga-upod man ang iban nga transport groups kaangay sang Kabakod Negros Transport Coalition Incorporated (KNETCO) – Piston kag United Negros Drivers and Operators Center (UNDOC) – Piston.
Ini bangod ang tatlo ka grupo ang nagtingob sa Negros United Transport Coalition (NUPC) kag magadangat sa masobra isa ka libo ang magapasakop sa nationwide transport strike.
Apang aminado si Catedral nga mahimo may pagbag-o pa bangod matapos ang anunsyo ni Manibela chairman Mar Valbuena, nagpahayag man si Department of Transportation Secretary Vince Dizon nga luyag sini makighinon-anon sa mga transport liders.
Paathag ni Catedral nga sila ang magapatigayon sang untat-byahe bilang panawgan nga irenew ang prangkisa sang mga unconsolidated traditional jeepneys.
Dugang pa sini nga sala ang datos sang Land Transportation Franchising and Regulatory Board nga 86 porsyento na ang consolidated jeepneys.
Suno kay Catedral, ang ginsumiter nga report sang LTFRB Regional Offices partikular na sa Western Visayas ang kabutigan lamang.
Dugang pa sini nga may resolusyon na sa Senado nga nagapostpone sang Jeepney Modernization program kag magapatigayon anay sang dugang nga pagtuon.
Samtang nagapatigayon pa sang pagtuon, panawagan sang mga ini nga makaparehistro kag mahatagan sang temporaryo nga prangkisa bangod sa karun sila ang nagarisgo sa pagbyahe apisar nga wala sang mga dokumento kag wala sang insurance.
Pangabay nila nga mapahanugutan ang request bisan isa ka tuig lamang, agud indi mabutang sa alang-alang ang mga commuters.
Pabor man ang mga ini sa pagbulos ni Dizon kay former DOTr Secretary Jaime Bautista nga sarado nagid ang pinsar.
Nagalaom si Catedral nga paagi kay Dizon, makadihon sang win-win solution sa problema sang transport sector.
