Nagalaom ang unconsolidated traditional jeepney drivers and operators nga batunon sang Land Transportation Franchising and Regulatory Board Region 6 (LTFRB 6) ang resolusyon nga gindagdag sang Bacolod City Council.
Sa interview sang Bombo Radyo Bacolod kay Rudy Catedral, presidente sang Bacolod Alliance of Commuters, Operators and Drivers (BACOD) – Manibela, wala na sang mga ini gindayun ang lima ka adlaw nga untat-byahe nga kuntani patigayunon halin kahapon Pebrero 17 tubtob 21.
Ini bangod sa madinalag-on nga inisyal nga negosasyon sa mga opisyales sang ciudad.
Ang Sangguniang Panlungsod, sa pagpanguna ni Floor Leader Councilor Atty Renecito Novero kag Councilor Al Victor Espino, ang chairperson sang Committee on Transportation, ang nagpasar sang resolusyon nga nagarequest sa LTFRB nga sila ang mahatagan sang temporary provisional authority kag electric certificate.
Pinaagi sini sila ang makakuha man sang mayor’s permit.
Madumduman nga ang transport strike ang ila nga ginpahayag matapos magpagwa sang statement si Bacolod Traffic Authority Office (BTAO) Head Patrick Leonard Lacson nga sila ang dakpon sa pagtakop sang Business One Stop Shop sa Bacolod City Government Center para sa paggawad sang business permit.
Suno kay Catedral, ang konseho mismo ang nagpahayag nga wala sang gahom ang BTAO sa pagpanakop bangod ini ang trabaho sang Land Transportation Office (LTO).
Panindugan sini nga sila ang nagahingyo nga mahatagan sang prangkisa bangod indi lamang ang mga drivers kag operators ang apektado kun sila ang mag-untat sang byahe kasubong man ang mga commuters nga maga-antos sa mataas nga plete kag kulang nga units sang modernized jeepneys.
Suno diri, humalin sang Abril 30 nakaligad nga tuig, wala na sang traditional jeepneys nga nakarenew sang prangkisa kag ang mga ini ang nagabyahe na lamang nga colorum.
Aminado ini nga ang pagbyahe sang colorum ang dako man nga risgo sa mga commuters inkaso sang aksidente.
