Kun kaisa ang guba nga dalan makahalt sa mga nagabyahe apang para naman sa isa ka pamilya sa India, nakabulig ang guba nga dalan sa pagsalbar sa 50 anyos nga babayi nga gindeklarar na nga brain-dead.
Sang tinalikdan nga bulan gindala sa ospital si Vineeta Shukla matapos ini malipongan samtang nagapanglimpyo sa balay.
Bangod severe na ang kondisyon sini, siya ginrefer sa mas advance nga medical facility kun sa diin matapos ang pila ka mga tests, gindeklarar ini nga brain-dead.
Matapos ang diskusyon sang pamilya sa mga doktor, nahibaloan nga wala na sang paglaum pa nga mabalik sa normal ang iya kondisyon.
Nagdesisyon ang pamilya ni Shukla nga magpreparar na para sa lubong sini.
Apang samtang ginabyahe sakay sa ambulance si Shukla, may nalabyan nga buho sa dalan ang salakyan nga nagresulta sa pag-uyog sang ambulance.
Nakita sang pamilya nga nagnormal na ang pagginhawa ni Shukla kag tubtob didto nag-imprubar na ang iya kondisyon.
Nakapauli na si Shukla sa ila balay kag naga-esturya na sa iya pamilya nga sang tinalikdan lang nagapreparar sang iya last will kag lubong.
