Nagpahanumdom ang isa ka guidance counselor nga gilayon magpalantaw sa psychologist ukon psychiatrist kun may sintomas na sang depression kag indi na hulaton pa nga maglala.
Ini kasunod sang paglumpat sang 34 anyos nga si Alyas John, nga gina-alegar nagasuprer sang depression gikan sa third floor sang Ayala Malls Capitol Central kagab-i.
Sa interview sang Bombo Radyo Bacolod kay Sir Chris, nagakasubo ini nga mabatian nga may-ara sang ginbawian sang kabuhi bangod sa balatian.
Suno diri, indi dapat nga kabigon nga ini ang pag-inarte lamang, bangod ang depression ang nagakinahanglan gid sang intervention.
Ang anxiety ang masami naga-umpisa sa mga problema kaangay sang indi makabayad sang tuition sa eskwelahan ukon problema sa trabaho kag iban pa.
Kun duha ka semana na nga yara ang sintomas, indi na magduhaduha pa nga magpakonsulta.
Kalakip sa palatandaan ang pagbag-o sang sleeping habit kalakip na ang masami nga pagtulog ukon mabudlay nga makatulog.
Kasubong man ang pagbag-o sa gana sa pagkaon, kaangay sang hinali nga pagdamo sang kaon ukon nagapagutom.
Sa masami ang pasyente ang indi makanotisyar sang pagbag-o apang ini ang matalupangdan sang mga kaupod sa balay.
Kalakip man sa nagabag-o ang social engagement, kun sa diin mabudlayan na sa pag-atubang sa iban nga tawo.
Ini ang masami ginatrigger sang mga issue nga indi masolbar kag kaangay nga indi maprocess sang kaugalingon.
Sa pihak nga bahin, kun napaidalom na sa rehabilitation, dapat gihapon nga may treatment plan.
Dugang man sini nga may dosage sa medication, gani indi pwede nga kun san-o lang magtumar sang bulong.
Pahanumdom ni Sir Chris nga kun nakitaan sang sintomas ang isa ka persona kag wala na nagagwa sa kwarto, dapat nga kuhaon sa panulok sini partikular na sa kwarto ang mga matalom nga bagay kag mga kalat ukon alambre nga mahimo magamit sa pag-utas sang kabuhi.
Dapat man nga masami estoryahon ang pasyente agud marelieve ang tension.
