Ginahulat pa ang guidelines sang Department of Education sa physical End-of-School-Year rites sa mga lugar nga yara sa idalom sang Alert Level 1 kag 2.
Sa interview sang Bombo Radyo kay Hernani Escullar Jr., public information officer sang DepEd Region 6, gin-anunsyar ni Education Secretary Leonor Briones nga pahanugutan na ang face-to-face graduation sa mga eskwelahan sa mga lugar nga yara sa idalom sang Alert Level 1 kag 2 kasunod sang konsultasyon sa LGU kag pagasundon ang protocols sang Inter-Agency Task Force.
Ang mga eskwelahan naman sa mga lugar nga yara sa idalom sang Alert Level 3, 4 kag 5 ang magapatigayon lamang sang virtual End-of-School Year rites.
Suno kay Escullar, ang mga eskwelahan sa bilog nga pungsod ang magapatigayon sang graduation rites halin Hunyo 27 tubtub Hulyo 2.
Ang school year naman ang magatakop sa Hunyo 24, samtang ang pribado nga mga eskwelahan ang magatuman sa schedule nga yara sa ila school calendar.
Ginalauman naman nga ang mga completers, parents ukon guardians, manunudlo, school officials kag guests ang pahanugutan nga makatambong sa virtual rites agud masiguro ang protection kag safety sang tagsa-tagsa.
Padayon naman ang pahanumdom sang DepEd sa mga opisyal sang eskwelahan nga indi paggamiton ang buluthuan bilang political forum.
