Ginahulat pa sang provincial government sang Negros Occidental ang sabat sang Department of Agriculture angot sa guidelines sang pagbaligya sang P20 kada kilo sang bugas.
Nahibaluan nga nagkighinun-anon sang tinalikdan nga adlaw si Negros Occidental Provincial Administrator Atty. Rayfrando Diaz kay Negros Island Region DA Regional Director, Jose Alberto Barogo para sa guidelines sang pagbaligya sang P20 per kilo sang bugas.
Sa interview sang Bombo Radyo Bacolod kay Atty. Rayfrando Diaz, luyag gid sang gobernador sang Negros Occidental nga suportahan ang programa kag kapin 5,800 ka sako sang bugas kuntani ang baklon sa NFA.
Suno kay Diaz, ang probinsya ang may yara na sang budget apang ang dako nga pamangkot ang mechanics kun paano ini himuon.
Suno diri, sin-o ang mabaligya sang 5,800 ka sako sang bugas kag bala ginapahanugutan ini sang layi ukon may yara bala sang business permit sa pagbaligya sang bugas?
Dugang pa nga pamangkot, ang P20 nga income sin-o bala ang mabaton kag paano ini ma-account?
Ang nasambit nga pamangkot ang iya ginpalab-ot sa DA Negros Island angot sa ginaduso sang Department of Agriculture nga pagbaligya sang bugas nga P200 kada kilo.
Suno kay Diaz, may ara sang guidelines kag ini ang ginahatag nalang sa Local Government Unit ang pagpatuman sini apang indi man maathag ang pagsulundan sa pagpatuman sini agud nga masiguro nga wala sang balik sa LGU nga liabilities sa ulihi.
Ang Negros Occidental ang malawig na nga nagapatuman sang pagbaligya sang manubo nga presyo sang bugas antes pa man nagpropose ang DA kag padayunon pa ini.
