Ginkalipay sang kampo sang complainant batok kay Moises Padilla Mayor Ella Garcia Yulo ang desisyon sang Office of the Ombudsman Visayas nga pamatbatan nga guilty ang alkalde sa ‘grave abuse of authority’ kag ‘neglect of duty.’
Nahibaluan nga ginpamatbatan nga guilty ang alkalde kag sanday Archie Montelibano, head sang Human Resource Management Office; kag Warren Jocson, officer-in-charge sang Business Permit and Licensing Office.
Ini kasunod sa complaint nga ginfile sang tag-iya sang isa ka funeral parlor nga si Ramona Nalagon Villaflor sang Setyembre 11, 2023.
Pahayag ni Villaflor, nacomply na sini ang tanan nga requirements kag nabayaran naman ang fees apang malawig nga wala gin-aktuhan ang iya application sang business permit tubtob nga gindeny.
Bangod sini, si Yulo kag ang duha ka empleyado ginmultahan sang katumbas sang anom ka bulan nga sweldo.
Ini ang mahimo kuhaon sa sweldo ukon sa mga benepisyo, samtang sila ang magapadayun lamang sa pagtrabaho.
Sa interview sang Bombo Radyo kay Atty April Abastillas, legal counsel ni Ramona Nalagon Villaflor, ila ginakalipay ang desisyon sang Office of the Ombudsman bangod ini nagapakita sang importansya sang right to due process, accountability kag patas nga serbisyo sa publiko.
Iya man gin-athag nga ang iya kliyente maprocess lamang sang renewal kag indi para sa bag-o nga application sang business permit nga ginpadugayan pa sang pila ka bulan para i-deny lamang.
Pahayag ni Abastillas, mangin ehemplo ini sa iban man nga public officials nga dapat sundon ang insakto kag legal nga proseso.
