Ginakonsiderar ang probinsya sang Negros Occidental nga isa sa may pinakamadamo nga Comelec gun ban violators sa Pilipinas as of February 14, 2022.
Suno kay P/Lt Col. Arnel Solis, tagpamaba sang Police Regional Office 6, sang Pebrero 14, ang mga narecord nga violation sa gun ban sa Western Visayas ang nagdangat na sa 61 ka mga insidente nga ginalakipan sang 24 ka Negros Occidental, pito sa Aklan, duha sa Antique, apat sa Capiz, isa sa Guimaras, 11 sa Iloilo, lima sa Iloilo City kag pito sa Bacolod City.
Nagdangat naman sa 64 ang kabug-usan nga naaresto sa nasambit nga bayolasyon sa rehiyon nga ginalakipan sang 27 sa Negros Occidental, pito sa Aklan, duha sa Antique, apat sa Capiz, isa sa Guimaras, 11 sa Iloilo, lima sa Iloilo City kag pito sa Bacolod City.
Nagdangat naman sa 45 ang numero sang nakumpiskar nga armas luthang nga ginalakipan sang 19 sa Negros Occidental, tatlo sa Aklan, tatlo sa Antique, apat sa Capiz, isa sa Guimaras, walo sa Iloilo, pito sa Bacolod City samtang wala naman sang nakumpiskar nga armas luthang sa syudad sang Iloilo.
Samtang nagdangat naman sa 24 ang mga narecover nga deadly weapons nga ginalakipan sang siyam sa Negros Occidental, apat sa Aklan, isa sa Capiz, duha sa Iloilo, anom sa Iloilo City kag duha sa Bacolod City samtang wala naman sang nakumpiskar nga deadly weapons sa Guimaras kag Antique.
Suno kay Solis, ang Comelec Gun Ban ang magalawig pa tubtob sa Hunyo 8, 2022.
Pahanumdom sini sa publiko nga sundon ang mga pagsulundan ukon ipaiway anay ang pagdala sang mga armas luthang tubtob sa magtakop ang Gun Ban Period.
Paathag sang PRO 6 spokesperson nga ang mga madakop nga makuhaan sang armas ang pagapasakaan sang kaso nga paglapas sa Comelec Resolution 10728 ukon ang Comelec Gun Ban kasubong man ang Republic Act 10591 ukon ang comprehensive firearms and ammunitions regulation act.
