Ginakalipay sang Bacolod City Police Office nga nangin madinalag-on ang ila nga security deployment sa ginpatigayon nga Grand Salubong para sa Masskara Festival 2024.
Sa interview sang Bombo Radyo Bacolod kay BCPO public information officer Police Captain Ma. Liberty Indiape, ginakalipay ni BCPO Director Police Col. Joeresty Coronica nga nangin epektibo ang ginplastar nga security preparation.
Nahibaluan nga gindagsa sang ginabanta 45,000 nga mga tawo ang Grand Salubong sa Bacolod City Government Center kagab-i.
Apisar sa kadamuon sang tawo, ginapasalamat ni Indiape nga nagakooperar man ang mga festival goers.
Suno diri, mas nagdugok ang mga tawo sang nagapatigayon na sang concert tubtob matapos, kag sila ang nagbantay halin sa umpisa tubtob kaina sang aga.
Sila ang nagpatigayon lamang sang shifting para sa mga ginadeploy nga PNP personnel sa nagkalainlain nga festival sites.
Pangabay naman sini sa festival goers nga magkooperar sa mga polisa kag regulasyon sang ciudad kadungan sang Masskara Festival 2024.
Sa pihak nga bahin opisyal naman nga ginpatuman ang gunban sumugod kagab-i tubtob na sa Oktobre 27.
Paathag ni Indiape nga suspendido ang mga permit to carry firearms outside residence magluwas lamang sa mga yara sa official duty kaangay sang mga kapulisan, militar kag iban pa nga mga uniformed law enforcement units.
Kalakip man sa exempted ang mga security guard, basta yara sa serbisyo.
Sa pihak nga bahin, ginpaathag ni Indiape nga ang mga magabayolar ang magapangatubang sang nagakaigo nga kaso.
