Nagpagwa na sang pahayag ang gwardiya nga nagviral sa social media matapos nga ginkastigo ang duha ka mga persona nga ginapahayag mga kawatan sa isa convenience store sa bahin sang Libertad Public Market sa ciudad sang Bacolod.
Sa interview sang Bombo Radyo kay Milandro Dieron, papauli na siya sadto sang natabo ang insidente kun sa diin naglisensya sa Boss niya nga magpauli na apang hulaton nalang sini ang relyibo sini bangud alas-5:00 naman ang takna sang aga.
Suno kay Dieron, matapos makalisensya nagpangihi ini sa tabok sang convenience store sang nakita sini ang e-bike nga ginasakyan sang ginapahayag nga kawatan.
Suno diri, ang duha ka mga ginapahayag nga mga kawatan ang nagsulod sa convenience store samtang ang isa ang nagasakay sa ebike.
Ginpahayag sini nga ang duha ang nagkuha sang duha ka dosena nga kape kag nakita sini mismo kun paano ginsulod sa bag sang mga ini.
Nagkuha ang duha sang chichirya kag nagbayad sa counter.
Ginpamangkot niya man ini kun sa diin na ang ginkuha kag nagpanginwala man ang duha.
Suno kay Dieron, gin-unahan na sini ang duha kun sa diin ginkastigo niya ini santo man sa nakita sa video bangud ang isa nga may dala nga bag ang nagahana nga may kuhaon sa bag kag wala man ini sang armas.
Ang binangon naman ang nakuha niya sa bodega sang iya amo kun sa diin ginagamit sa pag-utod sang dos por dos nga kahoy.
Ginhangkat man sini ang duha nga magbato.
Nag-abot man ang pulis kun sa diin ginhambal sang gwardiya nga nangawat ang duha nga indi man mag-ako kag ang ginapahayag nga ginkawat nga kape ang ginhaboy lang malapit sa opisina sa sulod sang store.
Ginpahayag man sang gwardiya nga ika-9 na ini ka beses nga nangawat sa store ang mga ginapahayag nga kawatan.
Suno kay Dieron, ginpapauli man sang mga police siya kag ang duha nga gina-alegar nga nangawat.
Samtang suno sa gwardiya nga ang pagsakit sini sa duha ang pagpaniguro lamang bangud wala siya sang armas kag mahimo nga siya ang patyon man.
Sa karun, lain na nga establishmento ang ginpadutyhan kay Dieron.
