Nadakpan na ang gwardiya nga nagtiro-patay sa isa ka anay empleyado sang 7G Tayco International Corporation sa Ceres Village, Purok Kasilingan 2, Barangay Mansilingan, Bacolod City sang Domingo.
Sa interview sang Bombo Radyo kay Police Lt. Conrado Espino Jr., station commander sang Bacolod Police Station 7, ginkumpirmar sini nga naaresto si Antonio Enanoria, 25-anyos sa Purok Narra, Barangay Tabugon, Kabankalan City alas 12:15 kahapon sang hapon.
Suno kay Espino, ginpahayag ni Enanoria nga nagpamilit sulod ang biktima nga si Juvy Natividad Jr., 31 anyos kag residente sang Barangay Granada, Bacolod City kag nagsabtanay ang mga ini.
Suno sa hepe, ginpahayag sang suspetsado nga nagdulom ang iya panulukan rason kun ngaa iya gintiro si Natividad sang makatatlo ka beses gamit ang 12 gauge shot gun.
Wala ini sang narekord nga kaso apang ginaalegar nga si Enanoria man ang nagpatay sa iya utod sang tuig 2019.
Suno kay Espino, magapangatubang sang kaso sang murder ang security guard.
